29.07.2025ж, Ж.Бектұров атындағы Қарағанды облыстық жасөспірімдер кітапханасында Қазақстанның еңбек сіңірген қайраткері,   Қазақстан Журналистер одағының мүшесі, Мағауия Сланбекұлы Сембайдың туғанына 70 жыл толуына орай «Қалам ұшындағы аманат» атты еске алу кеші өтті.

Іс шара барысында Мағауия Сланбекұлының рухани ағасы академик, Қазақстанның еңбек сіңірген қайраткері Зарқын Тайшыбай, Қарағанды облысының Құрметті азаматы Рымбала Кенжебалиқызы Омарбекова, «Орталықта» иық тіресе жүріп, қызмет еткен қаламдастары «Парасат» орденінің иегері Аман Жанғожин, Қазақстанның Құрметті журналисі Сүйіндік Жанысбай, Сағат Батырхан, «Құрмет» орденінің иегері Серік Сексенұлы, белгілі журналист, «Saryarqa Aqparat» медиахолдингінің директоры Қайрат Жүнісұлы Әбілда, сонымен бірге шәкірттері «Орталық Қазақстан» газетінің бас редакторы, «Мағауия Сембай» атындағы журналистерді қолдау қорының төрағасы Ерсін Кәрібайұлы Мұсабек, Қазақстан Жазушылар одағының Қарағанды облысындағы өкілі Жанат Жаңқашұлы, сондай-ақ Мағауия Сланбекұлының әулеті атынан Тұрсын апай жылы естеліктерімен бөлісті.

Мағауия Сембайдың көзі тірісінде «Қолыма қалам алдым айтамын деп...», «Алаштың Алдаспаны», «Құбылыс», «Жерұйық», «Ойтамызық», «Наркескен» жинақтары жарық көрсе, өмірден өткен соң шәкірті Ерсін Кәрібайұлы мен жары Мейраш Мұқашеваның құрастыруымен «Қаламға сүйенген тағдыр», «Қоңыр наз» атты қос кітабы шықты. Қаламгер Мағауия Сембайдың 70 жылдығына арналған еске алу кешінде «Ой қазына» атты кітабының тұсауы кесілді.